Dose Pesos per Unit?

Nabigyan ako ng pribilehiyo bilang maging iskolar ng bayan sa Politeknikong Unibersidad ng Pilipinas (Manila) kung saan ang edukasyon ay talagang abot kamay sa dose pesos per yunit na pinapatupad dito. Halos Isang libo lamang ang tuition ng isang estudyante kumpara sa mga iba pang mga unibersidad. Talaga namang malaking ginhawa lalung lalo na sa mga aking magulang na hindi na masyadong namomroblema sa aking mga pag-aaral.

Pero simula ng suriin ko ang breakdown ng tuition ko, napansin kong may mga "miscellaneous fees" pa kong binabayaran. Sa sobrang laki nga nito, mas malaki pa siya mismo sa aking tuition fee talaga kung pagbabasehan ang presyo kada unit kada semestre.

Lalo pa akong nayamot dahil ngayong summer, kailangan kong kunin ang isang subject na naibagsak ko. 3 units yun pero dahil di open ung subject na yun, kinuha na lang namen ung 4 units nun. So expected ko, 4 X 12= 48, 48 pesos lang ang babayaran ko. Pero pucha. 569 ung babayaran ko sa landbank! Para sa isang subject? Nays. Wala pang 10% ng 48 pesos na dapat lang ay babayaran ko! Jusko. Tunog nanay na nagtitipid na yung tono ko sa taas ng tuition fee para sa isang subject.

Kaya malaki din ang mga pagpapasalamat ko sa mga patuloy na nakikipaglaban sa mga estudyante sa aming pamantasan. Kahit namimis'interpret sila minsan, hindi madalas talaga. Ayun, patuloy pa rin sila sa pakikipaglaban para sa ating mga interes bilang iskolar ng bayan. Ang mga tinutukoy ko, syempre walang iba, ung mga aktibista. May mga kakilala ako at sa maikling panahon na nakasalamuha ko sila, masasabi kong astig sila. Yung di natatakot na ilabas ang kanilang nararamdaman. Matibay sa kanilang pinaglalaban. Pero kung ako ay tatanungin kung gusto kong mapasama sa kanila? Ang sagot ko pa rin ay "hindi". Hindi dahil eto ang gusto ko, ayoko nang magpaliwanag pa. Pero hindi dahil sa ayaw ko ay di ko sila sinusuportahan. Ayaw ko madismaya ang aking mga magulang at ayoko rin mapabayaan ang aking pag-aaral. Dahil sa simula pa lang, kaya ako pumasok sa PUP ay para makapagtapos at matulungan ang aking mga magulang.